Polisi Muser – Muser Ngubengi Deso – Deso Sing Ono Pilkades

Salah sijine anggota Polres Semarang Polda Jateng, nekani omah salah sijine calon Kades, Kemis (06/12/2018) wengi. (Foto: Dok. Humas)

Ungaran, beritaglobal.net – Jajaran Polres Semarang Polda Jawa Tengah, muser – muser nekani deso – deso, nyedaki wektu pilihan kepala desa ono ning sebagian daerah ono Kabupaten Semarang, Jumuah (07/12/2018).

Bareng karo soyo akehe prakaryan wargo sing desone kelebu deso sing njalanke pilihan Kades, dikuatirake yen ono gangguan keamanan lan ketertiban ning masyarakat. Contone, bekenengan wargo sing podo nyengkuyung salah sijine calon Kades, utowo mundake tumindak julig ono ning Wilayah Kabupaten Semarang.

Nindakki dawuh soko Kapolres Semarang AKBP Adi Sumirat, S.I.K., M.H., M.M., sing ndawuhake kabeh jajaran Polres Semarang terus muser – muser lan nekani tiap – tiap deso, kanti ngawasi bagian – bagian penting sing ono ning deso, semono ugo omah – omah wargo.

Sak jerone nekani deso – deso, anggota polisi dijaluk menehi pemahaman nang warga deso, supoyo luwih waspodo, trus nglaporake nang kantor Polisi sing paling cedak, yen ono ontran – ontran poro wargo sing nyengkuyung calon Kades, utowo tumindak culiko liyane.

Kanti ono Polisi sing tansah ono ing tengah – tengah wargo, mugo – mugo benthik antarane poro wargo sing nyengkuyung calon Kades iso dihindari, utamane ono ing wayah wengi, wektu ono jagongan ono ing omah calon – calon Kades. (ABU/KHM)

Penulis: Arie Budi
Sing Nggubah: Khamim